ភាពអនុគ្រោះក្នុងការបើកច្រកទីផ្សារ
ប្រទេសកម្ពុជា បានចូលរួមក្នុងសហគមន៍ទីផ្សារពិភពលោក និងបានក្លាយជាសមាជិករបស់អង្គការពាណិជ្ជកម្មពិភពលោក្នុងឆ្នាំ២០០៤។ ដោយសារប្រទេសកម្ពុជា ត្រូវបានចាត់បញ្ចូលក្នុងក្រុមប្រទេសអភិវឌ្ឍន៍តិចតួច ទើបធ្វើឱ្យកម្ពុជា មានឱកាសទទួលបាននូវភាពអនុគ្រោះពិសេសពីបណ្តាប្រទេសនាំចូលជាច្រើនក្នុងពិភពលោក។ ទាំងសហរដ្ឋអាមេរិក និងសហគមន៍អឺរ៉ុប មានកម្មវិធីពិសេសជួយដល់កម្ពុជាដូចជា ការនាំចូលមិនយកពន្ធ និងមិនកំណត់កូតាជាដើម ក្នុងការនាំចូលមុខទំនិញស្ទើរគ្រប់ប្រភេទលើកលែងតែអាវុធសម្រាប់សហគមន៍អឺរ៉ុប (បច្ចុប្បន្ន ដក២០%) ហើយសហរដ្ឋអាមេរិក បានផ្តល់បញ្ជីមុខទំនិញប្រមាណ ៤៨០០ ប្រភេទផងដែរ។ ឧត្តមភាពទាំងនេះ ចាត់ទុកថាជាគុណប្រយោជន៍ដ៏ឧត្តម ដែលធ្វើឱ្យកម្ពុជា អាចចូលរួមប្រកួតប្រជែងជាមួយបណ្តាប្រទេសក្នុងតំបន់ ដូចជា ប្រទេសថៃ វៀតណាមជាដើម លើកលែងតែប្រទេសឡាវ និងភូមាដែលមានកម្រិតប្រហាក់ប្រហែលគ្នាហើយទទួបានភាពអនុគ្រោះទីផ្សារសហគមន៍អឺរ៉ុបដូចជា។
ដោយសារជាសមាជិកអាស៊ាន កម្ពុជា បានអនុវត្តន៍កិច្ចព្រមព្រាងពាណិជ្ជកម្មសេរីអាស៊ាន ព្រមទាំងទទួលបាន អត្ថប្រយោជន៍ពីកិច្ចព្រមព្រៀងស្តីពីភាពអនុគ្រោះពន្ធរួមសម្រាប់តំបន់ពាណិជ្ជកម្មសេរីអាស៊ាន (CEPT) តាមរយៈការកាត់បន្ថយ ឬ លុបចោលពន្ធគយទាំងស្រុងលើមុខទំនិញដែលផលិតនៅក្នុងប្រទេសរៀងខ្លួន ហើយធ្វើការនាំចេញទៅប្រទេសជាសមាជិកដូចគ្នា។
ការចូលជាធរមាននៃសហគមន៍សេដ្ឋកិច្ចអាស៊ាន (AEC) កាលពីចុងឆ្នាំ២០១៥ កន្លងទៅ អាស៊ានក្លាយជាទីផ្សាររួមដែលរាល់មុខទំនិញ សេវាកម្ម និងកម្មករជំនាញមានលំហូរដោយសេរី ឆ្លងកាត់ព្រំដែន។ បច្ចុប្បន្ន កម្ពុជា បាននាំចេញទៅទីផ្សាររួមនេះបានតិចតួចនៅឡើយ ហើយសង្ឃឹមថា ស្ថានភាពនេះនឹងមានការផ្លាស់ប្តូរក្នុងពេលខាងមុខ។ កម្ពុជា មានទីតាំងនៅចំចំណុចកណ្តាលនៃអាស៊ាន ដូច្នេះមានឱកាសច្រើនក្នុងការធ្វើអាជីវកម្មដើម្បីបង្កើនល្បឿនតភ្ជាប់ទំនាក់ទំនងសេដ្ឋកិច្ចជាមួយអាស៊ាន និងធ្វើសមាហរណកម្មទៅក្នុងច្រវាក់ផលិតកម្មតំបន់ ឬក៏ជាចំណុចប្រមូលផ្តុំនៃប្រព័ន្ធដឹកជញ្ជូននិងភស្តុភារនាពេលអនាគត។
សមាជិកភាពនេះ ក៏ជាប្រការល្អមួយដែលនឹងនឹងនាំផ្លូវឱ្យកម្ពុជា បានចូលរួមក្នុងកិច្ចពាណិជ្ជកម្មសេរីជាមួយប្រទេសដៃគូសេដ្ឋកិច្ច ដូចជា ចិន (ថ្មីៗបានចុះកិច្ចព្រមព្រាងរួចហើយ) ជប៉ុន កូរ៉េខាងត្បូង អូស្ត្រាលី ញូវស៊ីឡែន និងឥណ្ឌាផងដែរ ហើយមិនយូរ មិនឆាប់ កម្ពុជា ក៏នឹងបានចូលរួមក្នុងតំបន់ពាណិជ្ជកម្មសេរីជាមួយដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ដែលជាបណ្តុំទីផ្សារមានប្រជាជនប្រមាណជាង ៣០០០ លាននាក់ផងដែរ។
អំណោយផលើទីតាំងភូមិសាស្ត្រ
កម្ពុជា មានទីតាំងភូមិសាស្ត្រស្ថិតនៅចំចំណុចកណ្តាលអាស៊ាន មានព្រំប្រទល់ជាប់ប្រទេសថៃឡង់ដ៍ ឡាវ និងវៀតណាម។ ភូមិសាស្ត្រនេះបានផ្តល់ភាពងាយស្រួលក្នុងការជំរុញកំណើនទីផ្សារ និងធ្វើពាណិជ្ជកម្មជាមួយទីផ្សារក្នុងតំបន់បានយ៉ាងងាយស្រួល។ ឧទាហរណ៍ដូចជា៖ កម្ពុជា មានកំណើនខ្ពស់ក្នុងឧស្សាហកម្មកាត់ដេរសម្លៀកបំពាក់ ដែលធ្វើឱ្យប្រទេសនេះនាំចូលទំនិញជាច្រើនជាសាច់ក្រណាត់ និងវត្ថុធាតុដើមពីប្រទេសចិន ឬ នាំមកពីប្រទេសអាស៊ានដទៃទៀត តាមផ្លូវគោក និងផ្លូវសមុទ្រ។ កម្ពុជា ក៏មានការតភ្ជាប់ផ្លូវអាកាសជាមួយអាស៊ាន និងប្រទេសមួយចំនួនក្នុងតំបន់បានយ៉ាងល្អប្រសើរ។
អាកាសយានដ្ឋានអន្តរជាតិភ្នំពេញ បានទទួលជើងហោះហើរត្រង់មកពីទីក្រុងប៉េកាំង សៀងហៃ ក្វាងចូវ តៃប៉ិ សេអ៊ូល តូក្យូ បូករួមនិងការតភ្ជាប់ជាមួយពិភពលោកតាមរយៈការប្តូរជើងហោះហើរនៅប្រទេសកាតា និងទីក្រុងឌុយបៃជាដើម។ ដោយសារជំនួយអន្តរជាតិ និងភាពជាដៃគូជាមួយវិស័យឯកជន បានធ្វើឱ្យមានលំហូរសាច់ប្រាក់ និងលំហូរទុនវិនិយោគដ៏ច្រើនចូលមកវិនិយោគលើហេដ្ឋារចនាសម្ពន្ធ័រូបវន្ត ដើម្បីពង្រឹងថែមទៀតនូវការតភ្ជាប់ទំនាក់ទំនងសេដ្ឋកិច្ចជាមួយប្រទេសជិតខាង។
ជារដ្ឋាភិបាលដែលយកចិត្តទុកដាក់ចំពោះធុរកិច្ច
រាជរដ្ឋាភិបាលកម្ពុជា ទទួលស្គាល់ពីសារៈសំខាន់របស់ ទីផ្សារ និងវិនិយោគផ្ទាល់ពីបរទេស ជានិច្ចកាលតែងយកចិត្តទុកដាក់លើអ្នកជំនួញបរទេសដែលចូលមកធ្វើធុរកិច្ចនៅក្នុងប្រទេសកម្ពុជា។ គោលនយោបាយរបស់ប្រទេសផ្សេងៗនៅក្នុងតំបន់ពេលខ្លះប្រព័ន្ធការងារបង្កការលំបាកដល់អ្នកជំនួញបរទេស ប៉ុន្តែធុរជននៅក្នុងប្រទេសកម្ពុជា នឹងទទួលបាននូវអត្ថប្រយោជន៍ពីវិធានមួយចំនួនដូចជា៖
- កម្ពុជា ជាប្រទេសដែលមានប្រព័ន្ធសេដ្ឋកិច្ចបើកចំហរមួយនៅក្នុងតំបន់អាស៊ាន ដែលរដ្ឋាភិបាលយកចិត្តទុកដាក់ខ្លាំងលើការធ្វើជំនួញ និងមានការកែទម្រង់ច្រើន។
- គ្មានការរើសអើង៖ ពុំមានការលំបាកលើផ្លូវច្បាប់ ក្នុងការបើកក្រុមហ៊ុនអាជីវកម្មនៅក្នុងប្រទេសកម្ពុជា ដែលជនបរទេសធ្វើជាម្ចាស់ក្រុមហ៊ុន១០០% លើកលែងតែសិទ្ធិកាន់កាប់ដីធ្លី អ្នកជំនួញជនបរទេសអាចចូលរួមប្រកបអាជីវកម្មដូចក្រុមហ៊ុនក្នុងស្រុកដែលមានម្ចាស់ជាជនជាតិខ្មែរដោយស្មើភាពគ្នា។
- ពន្ធដារទាប៖ កម្ពុជា គឺជាប្រទេសមួយដែលមានរបបពន្ធដារមានការប្រកួតប្រជែងខ្ពស់នៅអាស៊ីអាគ្មេយ៍។ អត្រាពន្ធលើប្រាក់ចំណេញចំនួន ២០% គឺទាបជាងគេនៅក្នុងតំបន់ លើសពីនេះ ទំនិញស្ទើរគ្រប់ប្រភេទដែលនាំចេញពីកម្ពុជាគឺរួចពន្ធ។
- ការលើកទឹកចិត្តចំពោះអ្នកវិនិយោគ៖ រដ្ឋាភិបាលបានបង្កើតក្រុមប្រឹក្សារមួយសម្រាប់សម្របសម្រួលនិងលើកទឹកចិត្តអ្នកវិនិយោគទុនបរទេស ដែលមានបំណងមកវិនិយោគនៅកម្ពុជា។
- យកចិត្តទុកដាក់លើតំបន់វិនិយោគ៖ ដើម្បីកាត់បន្ថយពេលវេលា និងការចំណាយលើហេដ្ឋារចនាសម្ព័ន្ធ និងផ្នែករដ្ឋបាលនៅតំបន់ជាក់លាក់ណាមួយ រាជរដ្ឋាភិបាលបានអនុញ្ញាតឱ្យបង្កើតតំបន់សេដ្ឋកិច្ចពិសេសច្រើនកន្លែងនៅទូទាំងប្រទេស ដែលភាគច្រើនមាននៅក្បែរព្រំដែននៃប្រទេសជិតខាង និងនៅតាមតំបន់ប្រមូលផ្តុំផលិតកម្មជុំវិញរាជធានីភ្នំពេញ។ តំបន់សេដ្ឋកិច្ចនីមួយៗ មានក្រុមការងារសម្រាប់ផ្តល់សេវារដ្ឋបាល ពួកគេមានទំនាក់ទំនងរឹងមាំជាមួយក្រសួងស្ថាប័នរដ្ឋាភិបាល ទាក់ទងនឹងការងារនាំចូល / នាំចេញ ការចុះបញ្ជីផ្លូវការ និងដោះស្រាយបញ្ហានានាដែលអាចនឹងកើតមានឡើងក្នុងតំបន់។ល។
- ងាយស្រួលក្នុងការផ្ទេរប្រាក់ចំណេញ៖ ច្បាប់ស្តីពីការផ្ទេរប្រាក់ទៅបរទេស ឆ្នាំ១៩៩៧ បានចែងថា រាល់ប្រតិបត្តិការផ្ទេរសាច់ប្រាក់ទៅបរទេសតាមរយៈធនាគារស្របច្បាប់ណាមួយនៅក្នុងប្រទេសកម្ពុជា មិនត្រូវបានហាមឃាត់ឡើយ ដែលផ្តល់ភាពងាយស្រួលក្នុងការបង្វិលប្រាក់ចំណេញពីការធ្វើធុរកិច្ចនៅកម្ពុជា ទៅគណនីផ្ទាល់ខ្លួននៅស្រុកកំណើតរបស់ពួកគេ។
- ការកែទម្រង់ស៊ីជម្រៅ៖ ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលបានធ្វើការកែទម្រង់ប្រកបដោយភាពស្វាហាប់ និងម៉ឹងម៉ាត់ ដោយលើកយកបញ្ហានានាដែលកើតមានឡើងក្នុងអំឡុងពេលធ្វើធុរកិច្ចនៅកម្ពុជាមកដោះស្រាយជូនវិស័យឯកជន។ មានចំណុចជាច្រើនដូចជា ការធ្វើស្វ័យប្រវត្តកម្មក្នុងការចេញវិញ្ញាបនប័ត្របញ្ជាក់ប្រភពដើមទំនិញតាមប្រព័ន្ធអេឡិចត្រូនិច ការចុះបញ្ជីពាណិជ្ជកម្មនិងពន្ធដារតាមប្រព័ន្ធអេឡិចត្រូនិច ជាដើម ដើម្បីកាត់បន្ថយពេលវេលា កាត់បន្ថយការចំណាយរដ្ឋបាល កាត់បន្ថយការឱកាសជួបមុខគ្នាជាមួយមន្ត្រីថ្នាក់ក្រោមជាដើម ឱ្យស្របតាមបទដ្ឋានគតិ្តយុតថ្មីៗ របស់រដ្ឋាភិបាលកម្ពុជា។
កម្លាំងពលកម្មមានការប្រកួតប្រជែង
ប្រទេសកម្ពុជា បានរៀបចំបង្កើតបណ្តុំផលិតកម្មយ៉ាងឆាប់រហ័សនៅក្នុងតំបន់ ដោយទីផ្សារពលកម្មមានការប្រកួតប្រជែងខ្ពស់។ ឈ្នួលពលកម្មនៅកម្ពុជាមានតម្លៃថោកជាងប្រទេសជាដៃគូប្រកួតប្រជែងក្នុងតំបន់ ដោយមានការលើកទឹកចិត្តលើកម្លាំងពលកម្មក្នុងឧស្សាហកម្មតម្រង់ទិសនាំចេញ។
គុណភាពជីវិត
អ្នកវិនិយោគ /អ្នកជំនួញ ដែលមកធ្វើជំនួញនៅកម្ពុជា នឹងទទួលបានផលប្រយោជន៍ ពីជីវភាពស៊ីវិល័យ និងភាពទាក់ទាញ ជាមួយនឹងតម្លៃនៃការរស់នៅទាប និងមានឱកាសច្រើនដើម្បីស្វែងយល់ពីប្រទេស ដែលមានកេរ្តិ៍ដំណែលវប្បធម៌ប្រវត្តិសាស្ត្រ និងធម្មជាតិស្រស់បំព្រង។ តំបន់ដែលល្អសម្រាប់អ្នកវិនិយោគគឺរាជធានីភ្នំពេញ ខេត្តសៀមរាប និងខេត្តព្រះសីហនុ ជាដើម ជាពិសេសអ្នកវិនិយោគនឹងទទួលបាន គុណប្រយោជន៍ពីប្រជាសាស្ត្រដែលកម្លាំំងពលកម្មភាគច្រើនជាយុវជនវ័យក្មេង មានចំណេះដឹងល្អ ដែលជាផ្នែកមួយក្នុងការចូលរួមប្រកួតប្រជែងនាពេលអនាគត។
ឱកាសវិនិយោគ និងអាជីវកម្មក្នុងវិស័យមួយចំនួនដូចខាងក្រោម៖
- ឧស្សាហកម្មកាត់ដេរសម្លៀកបំពាក់ ស្បែកជើង កាបូបធ្វើដំណើរ
- វិស័យកសិកម្ម កសិឧស្សាហកម្ម និងការកែច្នៃផលិតផល
- វិស័យទេសចរណ៍និងសេវាបដិសណ្ឋារកិច្ច
- វិស័យសំណង់
- ម្ហូបអាហារ និងភេសជ្ជៈ
- សុខភាព និងឱសថ
- វិស័យហិរញ្ញវត្ថុ និងសេវាធានារ៉ាប់រង
- ព័ត៌មានវិទ្យានិងទូរគមនាគមន៍ និង E-Commerce
- គ្រឿងយន្ត និងទោចក្រយានយន្ត
- វិស័យអប់រំនិងសិក្សាធិការ
- ការរុករករ៉ែ…។ល។
ដំណើរការចុះបញ្ជីក្រុមហ៊ុន
វិនិយោគិនបរទេសដែលមានបំណងមកធ្វើធុរកិច្ចនៅកម្ពុជាត្រូវតែចុះបញ្ជីអាជីវកម្ម នៅក្រសួងពាណិជ្ជកម្ម (នាយកដ្ឋានចុះបញ្ជីពាណិជ្ជកម្ម)។ បច្ចុប្បន្នការចុះបញ្ជីបើកក្រុមហ៊ុន និងចុះបញ្ជីនៅអគ្គនាយកដ្ឋានពន្ធដារធ្វើឡើងតាមប្រព័ន្ធស្វ័យប្រវត្តកម្ម (Online)។ ប្រសិនបើក្រុមហ៊ុនត្រូវជ្រើសរើសបុគ្គលិកចូលបម្រើការងារ ត្រូវស្នើសុំនៅក្រសួងការងារ និងបណ្តុះបណ្តាលវិជ្ជាជីវៈ។ អាស្រ័យលើកម្មវត្ថុអាជីវកម្ម និងវិនិយោគរបស់ក្រុមហ៊ុន ម្ចាស់ក្រុមហ៊ុនត្រូវស្នើសុំអាជ្ញាប័ណវិនិយោគលើកម្រិតជំនាញ និងវិជ្ជាជីវៈតាមក្រសួងស្ថាប័នពាក់ព័ន្ធ។
បញ្ជីឯកសារសម្រាប់ត្រៀមចុះបញ្ជីបើកក្រុមហ៊ុន (អាជីវកម្មទូទៅ) រួមមាន
- ពាក្យស្នើសុំចុះបញ្ជីក្រុមហ៊ុន
- ឯកសារបញ្ជាក់ទីតាំង និងសិទ្ធិប្រើប្រាស់ (ប្លង់ទីតាំង កិច្ចសន្យាជួល ឬឯកសារបញ្ជាក់កម្មសិទ្ធផ្ទាល់ខ្លួន)
- ច្បាប់ថតចម្លងអត្តសញ្ញាណប័ណ ឬលិខិតឆ្លងដែន
- រូបថតម្ចាស់ភាគហ៊ុន
- លិខិតបញ្ជាក់ព័ត៌មានដើមទុនអាជីវកម្មពីធនាគារពាណិជ្ជស្របច្បាប់នៅកម្ពុជា
ព័ត៌មានលម្អិតស្តីពីការចុះបញ្ជីពាណិជ្ជកម្ម សូមទាក់ទងនាយកដ្ឋានចុះបញ្ជីពាណិជ្ជកម្ម នៃក្រសួងពាណិជ្ជកម្ម អាស័យដ្ឋាន ដីឡូតិ៍លេខ១៩-៦១ មហាវិថីសហព័ន្ធរុស្ស៊ី ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ទូរស័ព្ទលេខ៖ ០២៣ ៨៦៦ ០៥០ / ០១២ ៩៩៣ ១៨៨ / ០១២ ៩១០ ៥០៥
អ៊ីម៉ែល៖ [email protected]