ពិព័រណ៍នាំចូលអន្តរជាតិចិន នៅទីក្រុងសៀងហៃ សាធារណរដ្ឋប្រជាមានិតចិន
ពិព័រណ៍នាំចូលអន្ដរជាតិចិន គឺធាថ្នាលបើកច្រកសម្រាប់កិច្ចសហប្រតិបត្តិការជាអន្តរជាតិ រៀបចំឡើងដោយសាធារណរដ្ឋប្រជាមានិតចិន សម្រាប់គ្រប់បណ្តាប្រទេសទាំងអស់នៅជុំវិញពិភពលោកបានចូលរួមដើម្បីដាក់តាំងបង្ហាញពីសមិទ្ធផលនានាដែលសម្រេចបាន និងអនុវត្តសកម្មភាពពាណិជ្ជកម្មជាអន្តរជាតិ ក៏ដូចជាវេទិកាសម្រាប់ការចែកចាយទំនិញរបស់ប្រទេសចិនជាសកលទៅគ្រប់បណ្តាប្រទេសទាំងអស់នៅជុំវិញពិភពលោក។ ព្រឹត្តិការណ៍ពិព័រណ៍នេះ ក៏នឹងនាំឲ្យមានការបើកកិច្ចពិភាក្សា និងចរចារពាណិជ្ជកម្មជាសកលពាក់ព័ន្ធនឹងវិស័យសេដ្ឋកិច្ច ពាណិជ្ជកម្ម និងសេដ្ឋកិច្ចពិភពលោក ដើម្បីធ្វើឲ្យប្រសើរឡើងនូវការគ្រប់គ្រងសេដ្ឋកិច្ចជាសកល។
ជាករណីដែលកម្រឃើញមួយដែលប្រទេសកំពុងអភិវឌ្ឍន៍ដូចករណីប្រទេសចិន ដែលរៀបចំពិព័រណ៍នេះ ហើយដាក់ឈ្មោះប្រធានបទ “ ពិព័រណ៍ទំនិញនាំចូល” ។ ព្រឹត្តិការណ៍ពិព័រណ៍នេះ មិនត្រឹមតែ បានផ្តល់ឱកាសដល់គ្រប់បណ្តាប្រទេសនានជុំវិញពិភពលោកមានលទ្ធភាពពង្រីកការនាំចេញមកកាន់ប្រទេសចិន ប៉ុណ្ណោះទេ តែថែមទាំងជាវេទិកាសម្រាប់ប្រទេសទាំងអស់ចូលរួមសកម្មភាពពាណិជ្ជកម្មអន្តរជាតិ និងចែករំលែកកាលានុវត្តភាពនៃការធ្វើជំនួញជាមួយគ្នាទៅវិញទៅមក។
ក្រសួងពាណិជ្ជកម្មកម្ពុជា ធ្លាប់បានចូលរួមក្នុងព្រឹត្តិការណ៍ពិព័រណ៍នេះចំនួន ៣ លើករួចមកហើយ ដែលដឹកនាំដោយ ឯកឧត្តមប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម គឺលើកទី១ នៅឆ្នាំ២០១៨ លើកទី២ នៅឆ្នាំ២០១៩ និងលើកទី៣ នៅឆ្នាំ២០២០ ដោយបាននាំក្រុមហ៊ុនកម្ពុជាសំខាន់ៗទៅចូលរួម ដូចជាក្រុមហ៊ុនដែលពាក់ព័ន្ធវិស័យស្រូវអង្ករ សំណង់-អចលនទ្រព្យ គម្រោងវិនិយោគ ម្ហូបអាហារ និងភេសជ្ជៈ ជាដើម ដើម្បីចាប់ដៃគូពាណិជ្ជកម្ម និងពង្រីកទីផ្សារនាំចេញ។ ក្នុងឆ្នាំ២០២០ ដោយសារការរីករាលជំងឺកូវីដ-១៩ ពិធីបើកសម្ពោធពិព័រណ៍ទំនិញនាំចូលអន្តរជាតិចិន លើកទី៣ ធ្វើឡើងតាមរយៈប្រព័ន្ធវីដេអូ ក្រសួងពាណិជ្ជកម្ម បានចាត់ ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មតំណាង ឯកឧត្តមរដ្ឋមន្ត្រីដឹកនាំប្រតិភូចូលរួមពិធីសម្ពោធនៅរាជធានីភ្នំពេញ៕
ក្រសួងពាណិជ្ជកម្មកម្ពុជា ចូលរួមពិព័រណ៍ទំនិញនាំចូលអន្តរជាតិចិន លើកដំបូង នៅទីក្រុងសៀងហៃ សាធារណរដ្ឋ ប្រជាមានិតចិន ក្នុងឆ្នាំ២០១៨
ក្រសួងពាណិជ្ជកម្មនៃព្រះរាជាណាចក្រកម្ពុជា បានចូលរួម ពិព័រណ៍ទំនិញនាំចូលអន្តរជាតិចិន ជាលើកដំបូងដែលបានប្រព្រឹត្តិទៅចាប់ពីថ្ងៃទី០៥-១០ ខែវិច្ឆិកា ឆ្នាំ២០១៨ នៅទីក្រុងសៀងហៃ ប្រទេសចិន។ រដ្ឋាភិបាលនៃសាធារណរដ្ឋ ប្រជាមានិតចិន រៀបចំពិព័រណ៍នេះឡើងក្នុងគោលបំណងបង្ហាញពីចលនាទៅមុខដ៏សំខាន់របស់ចិន ក្នុងការបើកចំហរទីផ្សារ និងការជំរុញពាណិជ្ជកម្មជាអន្តរជាតិ។ ព្រឹត្តិការណ៍នេះ ក៏ជាវេទិកាដ៏សំខាន់បំផុតមួយ សម្រាប់កិច្ចសហប្រតិបត្តិ អន្តរជាតិរវាងប្រទេសចូលរួមទាំងអស់ ក្នុងការបង្ហាញស្នាដៃនៃការអភិវឌ្ឍប្រទេសរបស់ខ្លួន ទាក់ទងនឹងវិស័យសេដ្ឋកិច្ច និងពាណិជ្ជកម្ម។ ដោយឡែក ចំពោះការចូលរួមរបស់កម្ពុជាក្នុងព្រឹត្តិការណ៍នេះ គឺជាការបង្ហាញនូវការគាំទ្ររបស់កម្ពុជា ចំពោះគោលជំហររបស់ចិន ទៅលើការជំរុញ សាកលភាវូបនីយកម្មសេដ្ឋកិច្ច ពាណិជ្ជកម្ម និងការបើកចំហទីផ្សារ ដើម្បីធ្វើសមាហរណកម្មសេដ្ឋកិច្ចទៅក្នុងពិភពលោក ជាពិសេស ដើម្បីលើកកម្ពស់ដល់ការអភិវឌ្ឍប្រកបដោយចីរភាព និង និរន្តរភាពនៃទំនាក់ទំនងសេដ្ឋកិច្ច និងពាណិជ្ជកម្ម ទ្វេភាគីរវាងកម្ពុជា-ចិន ។
ពិព័រណ៍ទំនិញនាំចូលអន្តរជាតិចិន មានប្រទេស និង អង្គការអន្តរជាតិចូលរួម សរុបចំនួន ១៧២ នៅក្នុងនោះ មានក្រុមហ៊ុន សហគ្រាសចំនួន ៣,៦០០ក្រុមហ៊ុន ដែលមានអ្នកបញ្ជា ទិញធំៗក្នុងពិភពលោកជាង ៤០ម៉ឺននាក់។ សម្រាប់ព្រះរាជាណា ចក្រកម្ពុជា ក៏មានការចូលរួមពីតំណាងក្រុមហ៊ុនចំនួន ១០ និងមានការរៀបចំពន្លាជាតិ តាមរចនាបទខ្មែរ ទំហំ ១៣៦ម៉ែត្រការ៉េ ដើម្បីផ្សព្វផ្សាយពីសក្តានុពលវិនិយោគ ពាណិជ្ជកម្ម ទេសចរណ៍ និងវប្បធម៌ជាតិផងដែរ។
ពិព័រណ៍ទំនិញនាំចូលអន្តរជាតិចិន បានសម្ពោធបើកជាផ្លូវការនៅថ្ងៃទី០៥ ខែវិច្ឆិកា ឆ្នាំ២០១៨ ក្រោមអធិបតីភាព ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន និងមានការចូលរួមពីនាយកដ្ឋមន្ត្រី ឧបនាយក រដ្ឋមន្ត្រី និងរដ្ឋមន្ត្រីនៃបណ្តាប្រទេសនានានៅក្នុងតំបន់ និងពិភពលោក ដែលមានចំនួន ៣០០រូប និងមន្ត្រីពាក់ព័ន្ធជាច្រើនរូបទៀត។ ឯកឧត្តម ស៊ី ជីនពីង បានគូសបញ្ជាក់ថា៖ ប្រទេសចិន គឺជាមហាអំណាចសេដ្ឋកិច្ចទី២ លើពិភពលោក និងជាទីផ្សារដ៏ធំដែលមានសក្តានុពលអតិថិជន ១,៣០០លាននាក់ ដូច្នេះចិននឹងពង្រឹងគោលនយោបាយបើកចំហរ ហើយបន្តរៀបចំពិព័រណ៍ទំនិញនាំចូលអន្តរជាតិចិននេះ ឲ្យកាន់តែធំឡើងៗរៀងរាល់ឆ្នាំ។
ក្នុងឱកាសនៃការចូលរួមក្នុងព្រឹត្តិការណ៍នជ កម្ពុជា បានសំណូមពរដល់ប្រទេសចិន បង្កើនការនាំចូលអង្ករ និងកសិផល ពីកម្ពុជា ថែមទៀត ដើម្បីពង្រឹង និងពង្រីកទំហំពាណិជ្ជកម្មទ្វេភាគីកម្ពុជា-ចិន ឲ្យដល់គោលដៅដែលរដ្ឋាភិបាល នៃប្រទេសទាំង២ ចង់បាន។ កម្ពុជាបាននាំយកវត្ថុអនុស្សាវរីយ៍ជូនភាគីចិន ជាគំនូរសិប្បកម្មធ្វើពីថ្មម៉ាប ០១ផ្ទាំង ដែល មានរចនាបទខ្មែរយ៉ាងល្អវិចិត្រជូនភាគីចិន ដើម្បីរក្សាទុកជាវត្ថុអនុស្សាវរីយ៍នៅអគារតាំងពិព័រណ៍អចិន្ត្រៃយ៍ តាមការស្នើសុំ របស់គណៈកម្មការរៀប ចំពិព័រណ៍។
ការចូលរួមរបស់កម្ពុជា ក្នុងព្រឹត្តិការណ៍ពាណិជ្ជកម្មនេះ មានសារៈសំខាន់ណាស់ ដោយបានចូលរួមចំណែកក្នុងការជំរុញទីផ្សារផលិតផលរបស់កម្ពុជាទៅកាន់ទីផ្សារតំបន់ និងពិភពលោក ជាពិសេស បានបន្តពង្រឹង និងពង្រីកនូវទំនាក់ទំនងមិត្តភាពល្អយូរអង្វែងរវាងកម្ពុជា-ចិន ក៏ដូចជា បានបន្តជំរុញផលិតផលកម្ពុជាចូលទៅក្នុងទីផ្សារអន្តរជាតិ៕
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដឹកនាំគណៈប្រតិភូទៅចូលរួម រៀបចំពិព័រណ៍ ពិព័រណ៍ទំនិញនាំចេញអន្ដរជាតិចិនលើកទី២
ពិព័រណ៍ទំនិញនាំចូលអន្ដរជាតិចិនត្រូវបានប្រារព្ធធ្វើចាប់ពីថ្ងៃទី០៥-១០ ខែវិច្ឆិកា ឆ្នាំ២០១៩ នៅទីក្រុងសៀងហៃ ប្រទេសចិន។ ពិព័រណ៍នេះ បានបើកសម្ពោធជាផ្លូវការនាព្រឹកថ្ងៃទី ៥ ខែវិច្ឆិកា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន និងមានការអញ្ជើញចូលរួមពីនាយកដ្ឋមន្ត្រី ឧបនាយក រដ្ឋមន្ត្រី និងរដ្ឋមន្ត្រីនៃបណ្តាប្រទេសនានានៅក្នុងតំបន់ និងពិភពលោក ដែលញ់ុំងឲ្យពិធីនេះកាន់តែមានភាពទាក់ទាញ និងសារៈសំខាន់ជាងមុន។
ឆ្នាំ២០១៩ ក្នុងនាមប្រទេសកម្ពុជា ត្រូវបានអញ្ជើញជាប្រទេសកិត្តិយស ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូពីវិស័យសាធារណៈ និងក្រុមហ៊ុនឯកជនទៅចូលរួម ក្នុងព្រឹត្តិការណ៍ពិព័រណ៍ពាណិជ្ជកម្មនាំចូលអន្ដរជាតិចិនលើកទី២នេះ។ ឯកឧត្តមបានគូសបញ្ជាក់ថា ការចូលរួមរបស់កម្ពុជាក្នុងពិព័រណ៍កម្រិតពិភពលោកនេះ គឺជាការបង្ហាញនូវការគាំទ្ររបស់កម្ពុជា ចំពោះគោលនយោបាយបើកចំហរទីផ្សារលើទំនិញនាំចូលពីបរទេសមកទីផ្សារចិន និងជាការជំរុញចលនាទៅមុខនៃសកលភាវូបពាណិជ្ជកម្ម និងសមាហរណកម្មសេដ្ឋកិច្ច នៅក្នុងតំបន់និងពិភពលោក។
ព្រឹត្តិការណ៍ពិព័រណ៍ពិភពលោកនេះ ជាវេទិកាសេដ្ឋកិច្ច-នយោបាយក្នុងក្របខណ្ឌពិភពលោក មានប្រទេស/អង្គការអន្តរជាតិធំៗ ចំនួន ១៩២ ចូលរួម។ វេទិកានេះជាការតភ្ជាប់ទំនាក់ទំនងរវាងមនុស្ស និងសង្គម បង្ហាញនិងផ្លាស់ប្តូរវប្បធម៌ អរិយ្យធម៌ និងស្នាដៃបង្កើតថ្មី ដើម្បីធ្វើឲ្យពិភពលោកមានសុខដម្យនីយកម្ម។ កន្លងមកកម្ពុជាបានចូលរួមក្នុងព្រឹត្តិការណ៍កម្រិតភពលោកនេះ ជាបន្តបន្ទាប់ ក្នុងនាមស្មើសិទ្ធិលើទំនាក់ទំនងការទូតជាអន្តរជាតិ។ ជាលទ្ធផល យើងទទួលបានការគាំទ្រ និងទទួលស្គាល់ ពីស្ថេរភាពនយោបាយ សន្តិសុខសង្គម ការអភិវឌ្ឍន៍លើគ្រប់វិស័យលើឆាកអន្តរជាតិ។
ឆ្នាំនេះ ក្រសួងពាណិជ្ជកម្ម បានចាត់បញ្ជូនក្រុមហ៊ុនចំនួន ៣ ដែលពាក់ព័ន្អនឹងវិស័យកសិកម្ម អចលនទ្រព្យ និងគម្រោងវិនិយោគ មកចូលរួមក្នុងព្រឹត្តិការណ៍ពិព័រន៍នេះ។ ក្រសួង ក៏បាននាំយកផលិតផលសក្កានុពលរបស់កម្ពុជា មានដូចជា អង្ករ ម្រេច គ្រាប់ស្វាយចន្ទី វត្ថុអនុស្សាវរីយ៍ ម្ហូបអាហារក្រៀម និងភេសជ្ជៈ និងឯកសារផ្សព្វផ្សាយពីគោលនយោបាយវិនិយោគ ទេសចរ សេដ្ឋកិច្ច និងបរិយាកាសនៃការធ្វើធុរកិច្ចនៅកម្ពុជា សម្រាប់ផ្សព្វផ្សាយ និងចែកជូនភ្ញៀវផងដែរ។
ក្នុងអំឡុងពេលចូលរួមព្រឹត្តិការណ៍ពិព័រណ៍នេះ ប្រតិភូកម្ពុជា បានចូលរួមវេទិកាជំរុញពាណិជ្ជកម្ម ដែលរៀបចំឡើងដោយប្រតិភូពាណិជ្ជកម្មខេត្តយូណាន ស្តីពីកិច្ចសហប្រតិបត្តិការជំរុញការវិនិយោគលើវិស័យឧស្សហកម្ម ខេត្តយូណាន និងបានដឹកនាំវិស័យឯកជនចូលរួមកម្មវិធីផ្គូរផ្គងពាណិជ្ជកម្មមួយចំនួនផងដែរ ដើម្បីស្វែងរកដៃគូវិនិយោគ។
ការចូលរួមរបស់កម្ពុជាក្នុងព្រឹត្តិការណ៍ពាណិជ្ជកម្មនេះ ពិតជាមានសារៈសំខាន់ ដោយមានឱកាសបានផ្សព្វផ្សាយពីផលិតផលរបស់កម្ពុជាទៅកាន់ទីផ្សារតំបន់ និងពិភពលោក ជាពិសេសបន្តពង្រឹងទំនាក់ទំនងមិត្តភាពល្អយូរអង្វែងរវាងកម្ពុជា ចិន ក្នុងឱកាសនេះ សហព័ន្ធស្រូវអង្ករកម្ពុជា បានចុះអនុស្សរណៈយោគយល់ជាមួយក្រុមហ៊ុនចិន ក្នុងការផ្គត់ផ្គង់អង្ករចូលទីផ្សារចិនផងដែរ៕