(ភ្នំពេញ)៖ នាថ្ងៃទី០៤ ខែវិច្ឆិកា ឆ្នាំ២០២១ ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានដឹកនាំប្រតិភូពាណិជ្ជកម្មកម្ពុជា ចូលរួមពិធីសម្ពោធ “ពិព័រណ៍ទំនិញនាំចូលចិនអន្តរជាតិលើកទី៤ (The 4th China International Import Expo) និងវេទិកាសេដ្ឋកិច្ចអន្តរជាតិហុងឈាវ (Hongqiao International Economic Forum) តាមប្រព័ន្ធវីដេអូ រៀបចំនៅទីក្រុងសៀង ហៃប្រទេសចិន។ ព្រឹត្តិការណ៍ពាណិជ្ជកម្មកម្រិតពិភពលោកនេះ បានបើកសម្ពោធដោយមានការថ្លែងសុន្ទរកថា របស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន និងមានការថ្លែងសុន្ទរកថាស្វាគមន៍ និងគាំទ្រប្រទេសចិនថតទុកនិងចាក់ផ្សាយក្នុងពិធីសម្ពោធ ដោយប្រធានាធិបតី នៃប្រទេសអាហ្សង់ទីន ប្រធានាធិបតីប្រទេសកាហ្សាក់ស្តង់ ប្រធានាធិបតីសាធារណរដ្ឋហ្សាំប៊ៀ អនុប្រធានាធិបតីប្រទេសហ្វីជី នាយករដ្ឋមន្រ្តីប្រទេសអ៊ីតាលី នាយករដ្ឋមន្រ្តីព្រះរាជាណាចក្រថៃ អគ្គនាយិកានៃអង្គការពាណិជ្ជកម្មពិភពលោក អគ្គលេខាធិការនៃអង្គការ UNCTAD ព្រមទាំងមានការចូលរួមដោយផ្ទាល់ថ្នាក់ដឹកនាំក្រសួងស្ថាប័ន អង្គការ សមាគម បេសកជនបរទេស ស្ថានកុងស៊ុល និងអាជ្ញាធរទីក្រុងសៀងហៃ តំណាងមកពីទីក្រុងហុងកុង ទីក្រុងម៉ាកាវ កោះតៃវ៉ាន់ និងការចូលរួមពីចម្ងាយតាមប្រព័ន្ធវីដេអូអនឡាញរបស់ថ្នាក់ដឹកនាំជាន់ខ្ពស់ និងថ្នាក់រដ្ឋមន្រ្តី នៃបណ្តាប្រទេសនានានៅក្នុងតំបន់ និងពិភពលោកចំនួន១០៦ ប្រទេស។
ឯកឧត្តម ស៊ី ជីនពីង បានថ្លែងមតិស្វាគមន៍តាមរយៈការថតវីដេអូនិងចាក់ផ្សាយនាឱកាសនេះ បានអំពាវនាវឲ្យបណ្តាប្រទេសជុំវិញពិភពលោក ដើរឲ្យទាន់និន្នាការទូទៅនៃសកលភាវូបនីយកម្មសេដ្ឋកិច្ច និងរួមគ្នាគាំទ្រក្នុងការបើកចំហទីផ្សារ ជាពិសេសគាំទ្រគោលនយោបាយឈ្នះឈ្នះ ហើយប្រឆាំងគោលនយោបាយឯកតោភាគី និងលទ្ធិគាំពារនិយម និងជំរុញមនុស្សជាតិក្នុងពិភពលោកធ្វើដំណើរឆ្ពោះទៅរកអនាគតដ៏ភ្លឺស្វាងមួយ។ ឯកឧត្តម ស៊ី ជីនពីង បានសង្កត់ធ្ងន់ថា ឆ្នាំនេះគឺជាខួបលើកទី២០ នៃការចូលជាសមាជិកអង្គការពាណិជ្ជកម្មពិភពលោក WTO របស់ប្រទេសចិន។ ក្នុងរយៈពេល២០ឆ្នាំ កន្លងមកនេះ ប្រទេសចិនបានអនុវត្តន៍កញ្ចប់កិច្ចសន្យា នៃការចូលជាសមាជិក WTO របស់ខ្លួនយ៉ាងពេញលេញ ដោយកម្រិតពន្ធគយជារួមរបស់ប្រទេសចិនបានទម្លាក់ពី១៥.៣% មក ៧.៤% ដែលទាបជាង ៩.៨% នៃការសន្យាចូលជាសមាជិករបស់ WTO នាគ្រាដំបូង។
គួរបញ្ជាក់ថានេះគឺជាលើកទី៤ហើយ ដែលប្រទេសកម្ពុជាបានចូលរួមក្នុងព្រឹត្តិការណ៍ពិព័រណ៍ទំនិញនាំចូលចិនអន្តរជាតិ កម្រិតពិភពលោកមួយនេះ។ សម្រាប់ឆ្នាំ២០២១ នេះ ដោយសារការរីករាលដាលជំងឺកូវីដ-១៩ ប្រទេសកម្ពុជា ក៏ដូចជាបណ្តាប្រទេសផ្សេងៗទៀត មិនបានដឹកនាំគណៈប្រតិភូទៅចូលរួមដោយផ្ទាល់ទេ ទន្ទឹមនេះ ក្រសួងពាណិជ្ជកម្ម បានរៀបចំពន្លាជាតិមួយ និងក្រុមហ៊ុនកម្ពុជាចំនួន៥ ចូលរួមពីចម្ងាយតាមប្រព័ន្ធអនឡាញ និងបានសម្របសម្រួលឲ្យក្រុមហ៊ុនដែលកំពុងធ្វើធុរកិច្ចនៅកម្ពុជា ដែលមានសាខា និងផលិតផលនៅប្រទេសចិនស្រាប់ចូលរួមតាំងពិព័រណ៍ដោយផ្ទាល់ផងដែរ។
ក្នុងការចូលរួមពិព័រណ៍ទំនិញនាំចូលចិនអន្តរជាតិ លើកទី៤ ឆ្នាំ២០២១ នេះ ពន្លាជាតិកម្ពុជា ត្រូវបានរចនាឡើងតាមរចនាបថខ្មែរសម័យទំនើបតាមទម្រង់បច្ចេកវិទ្យា 3D ដោយមានដាក់តាំងបង្ហាញរូបភាពស្តីពីវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ និងវីដេអូផ្សព្វផ្សាយស្តីពីការអភិវឌ្ឍសេដ្ឋកិច្ចកម្ពុជាផងដែរ។ អ្នកទស្សនាអាចចូលទស្សនាពន្លាជាតិកម្ពុជាតាមរយៈតំណភ្ជាប់គេហទំព័ររបស់គណៈកម្មការរៀបចំពិព័រណ៍ https://country.ciie.org /2021/Cambodiaចាប់ពីថ្ងៃទី៥ ដល់ថ្ងៃទី១០ ខែវិច្ឆិកា ឆ្នាំ២០២១។
ពិព័រណ៍ទំនិញនាំចូលអន្តរជាតិចិនលើកទី៤ ឆ្នាំ២០២១ នេះ មានក្រុមហ៊ុនចូលរួមចំនួន ២៩០០ មកពីបណ្តាប្រទេសក្នុងតំបន់ និងពិភពលោក ចំនួន១៤៣ រួមទាំងកម្ពុជាផងដែរ ក្នុងនោះ មានប្រទេស និងអង្គការអន្តរជាតិធំៗចំនួន៥៨ បានរៀបចំពន្លាជាតិចូលរួមដោយផ្ទាល់ក្នុងព្រឹត្តិការណ៍ពិព័រណ៍នេះ។ ទំនិញដែលមានដាក់តាំងបង្ហាញក្នុងពិព័រណ៍នេះរួមមាន ផលិតផលម្ហូបអាហារ និងភេសជ្ជៈ ផលិតផល និងសម្ភារៈកសិកម្ម យានយន្ត ឧបករណ៍បច្ចេកទេស ទំនិញប្រើប្រាស់ទូទៅ ឧបករណ៍វេជ្ជសាស្ត្រ និងឱសថ និងពាណិជ្ជកម្មលើវិស័យសេវាកម្មជាច្រើនពាន់ប្រភេទ។
(រូបភាព៖នាយកដ្ឋានកិច្ចការពិព័រណ៍)