ឌុយបៃ សហភាពអារ៉ាប់រួម៖ នារាត្រីថ្ងៃទី៣០ ខែកញ្ញា ឆ្នាំ២០២១ វេលាម៉ោង ២០៖០០ នាទី ម៉ោងនៅទីក្រុង ឌុយបៃ ពិព័រណ៍ពិភពលោកឌុយបៃ ២០២០ ត្រូវបានសម្ពោធជាផ្លូវការ ក្រោមអធិបតីភាពដ៏ខ្ពង់ខ្ពស់របស់ ព្រះអង្គម្ចាស់ H.H. Sheikh Hamdan bin Mohammed bin Rashid Al Maktoum, Crown Prince of Dubai and Chairman of the Executive Council of Dubai ដោយមានការចូលរួមពីបណ្ដាប្រទេស និងអង្គការអន្តរជាតិធំៗ ចំនួន ១៩២ រួមទាំង ព្រះរាជា ណាចក្រកម្ពុជាផងដែរ។ គួរបញ្ជាក់ថា តាមកាលបរិច្ឆេទរបស់គណៈកម្មការរៀបចំពិព័រណ៍ ពិព័រណ៍ពិភពលោកឌុយបៃ ២០២០ គ្រោងសម្ពោធនៅដើមខែតុលា ឆ្នាំ២០២០ កន្លងទៅ ប៉ុន្តែត្រូវបានពន្យារពេល ១ ឆ្នាំ ដោយសាររងផលប៉ះពាល់នៃជំងឺកូវីដ-១៩។
ពិព័រណ៍ពិភពលោក២០២០ ឌុយបៃ គឺជាព្រឹត្តិការណ៍កម្រិតពិភពលោកលើកដំបូងដែល រៀបចំទ្បើងនៅតំបន់មជ្ឈិមបូព៌ា និងអាហ្រិ្វកខាងជើង (MENA) មានរយៈ ៦ ខែ ដោយគិត ចាប់ពីថ្ងៃទី០១ ខែតុលា ឆ្នាំ២០២១ ដល់ថ្ងៃទី៣១ ខែមីនា ឆ្នាំ២០២២ ស្មើនឹង ១៨២ ថ្ងៃ។ ប្រធានបទនៃពិព័រណ៍នេះ គឺ៖ ភ្ជាប់ចិត្ត បង្កើតអនាគត (Connecting Minds, Creating the Future) និងមានប្រធានបទរងចំនួន ៣ គឺ៖ កាលានុវត្តភាព, វឌ្ឍនភាព និង និរន្តរភាព។ តាមការរំពឹងទុក ពិព័រណ៍នេះនឹងទាក់ទាញភ្ញៀវចូលទស្សនាចំនួន ២៥ លាននាក់ ក្នុងនោះ ៧០% ជាភ្ញៀវមកពីបរទេស។
ព្រះរាជាណាចក្រកម្ពុជា ក្នុងនាមសមាជិកការិយាល័យពិព័រណ៍អន្តរជាតិ (BIE) បានចូលរួម ក្នុងមហាព្រឹត្តិការណ៍ កម្រិតពិភពលោកនេះ ដោយបានរៀបចំសាងសង់ពន្លាជាតិលើ ផ្ទៃដីទំហំ ៣៨៤.៥ ម២ មានកម្ពស់ ២ជាន់ស្ថិតនៅ ក្នុងតំបន់លេខៈ SA03-A ស្ថិតនៅក្នុង សង្កាត់និរន្តរភាព ( Sustainability)។ ព្រះរាជាណាចក្រកម្ពុជា ជាប្រទេស ដ៏ចំណាស់មួយក្នុងតំបន់អាស៊ីអាគ្នេយ៍។ ដើម្បីធ្វើឲ្យពិភពលោកបានស្គាល់នូវភាពសម្បូរបែបនៃសិល្បៈ វប្បធម៌ របស់កម្ពុជា និងភាពស្រស់បំព្រងនៃបរិស្ថានធម្មជាតិ ដែលជាសក្តានុពល នៃការអភិវឌ្ឍសេដ្ឋកិច្ចជានិរន្ត៍ ព្រះរាជាណាចក្រកម្ពុជាបានជ្រើសរើសយកប្រធានបទរងទី៣ គឺ “និរន្តរភាព” ជាប្រធានបទរបស់ខ្លួន។ ស្របតាមប្រធានបទរួមរបស់ពិព័រណ៍ពិភពលោក ២០២០ ឌុយបៃ “ភ្ជាប់ចិត្ត បង្កើតអនាគត” រួមផ្សំនឹងបទពិសោធន៍ចូលរួមពិព័រណ៍ពិភពលោក ជាច្រើនឆ្នាំកន្លងទៅ ពន្លាជាតិកម្ពុជា ត្រូវបានរៀបចំរចនាឡើងយ៉ាងប្រណិតតាមរចនាបទ ខ្មែរបុរាណ-សម័យ។
ក្នុងការរៀបចំសាងសង់ពន្លាជាតិមួយឲ្យ មានភាពទាក់ទាញ និងមានគុណតម្លៃខ្ពស់ គណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ ពាណិជ្ជកម្មអន្តរជាតិ បានឯកភាពគ្នាឲ្យរៀបចំសាងសង់ឡើងដោយច្របាច់បញ្ចូលគ្នា នូវសម័យកាលសំខាន់ជាប្រវត្តិសាស្រ្តរបស់ខ្លួនគឺ៖ សម័យមុនអង្គរ, សម័យអង្គរ, សម័យលង្វែក ឬសម័យឧត្តុង្គ និងសម័យចតុមុខ ឬសម័យភ្នំពេញបច្ចុប្បន្ន ដោយមាន ចក្ខុវិស័យបង្ហាញនូវភាពល្បីល្បាញផ្នែកវប្បធម៌ អរិយធម៌ខ្មែរដែលមានតាំងពីបុរាណរហូត មក និងការអភិវឌ្ឍសេដ្ឋកិច្ចនាពេលបច្ចុប្បន្ន។ កម្ពុជាបានរៀបចំតុបតែងពន្លាជាតិប្រកប ដោយភាពទាក់ទាញ ដើម្បីកសាងកេរ្តិ៍ឈ្មោះល្អនៅលើឆាកអន្តរជាតិដូចដែលធ្លាប់បាន ចូលរួមពិព័រណ៍ពិភពលោកនាពេលកន្លងមក ដើម្បីទាក់ទាញភ្ញៀវទេសចរណ៍បង្ហាញនូវ សក្តានុពលជាក់ស្តែងក្នុងការអភិវឌ្ឍសេដ្ឋកិច្ចជាតិ និងផ្សព្វផ្សាយនូវសមិទ្ធផលនានារបស់ រាជរដ្ឋាភិបាលកម្ពុជា។
ក្រសួងពាណិជ្ជកម្មក្នុងនាមប្រធានគណៈកម្មការអន្តរក្រសួង និងក្នុងនាមរាជរដ្ឋាភិបាល កម្ពុជា សូមអញ្ជើញជនរួមជាតិ និងភ្ញៀវអន្តរជាតិចូលរួមគាំទ្រ និងចូលទស្សនាពន្លាជាតិ កម្ពុជា ឲ្យបានច្រើនកុះករ ក្នុងអំឡុងពេលនៃការចូលរួមពិព័រណ៍ពិភពលោក២០២០ ឌុយបៃ នៅសហភាពអារ៉ាប់រួម។
(អត្ថបទនិងរូបភាព៖ ន/ដ្ឋានកិច្ចការពិព័រណ៍)
