រាជធានីភ្នំពេញ៖ នាល្ងាចថ្ងៃទី២៩ ខែមករា ឆ្នាំ២០២១ វេលាម៉ោង ១៨៖៣០នាទី លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អញ្ជើញជាអធិបតីក្នុងពិធីបើកសម្ពោធការតាំងបង្ហាញផលិតផលសិប្បកម្មកម្ពុជា “ផលិតនៅសៀមរាប / Made in Siem Reap” ចាប់ពីថ្ងៃទី៣០-៣១ ខែមករា ឆ្នាំ២០២១ នៅនៅអគារ ៣១៣ Quayside លេខ៣៣០ តីរវិថីព្រះស៊ីសុវត្ថិ រាជធានីភ្នំពេញ ក្រោមការអញ្ជើញចូលរួមដោយថ្នាក់ដឹកនាំនៃក្រសួងវប្បធម៌ និងវិចិត្រសិល្បៈ ក្រសួងឧស្សាហកម្ម សិប្បកម្ម វិទ្យាសាស្ត្រ និងនវានុវត្តន៍ ឯកអគ្គរដ្ឋទូតបារាំងប្រចាំនៅកម្ពុជា សភាពាណិជ្ជកម្មបារាំង មន្ត្រីរាជការ តំណាងក្រុមហ៊ុន អង្គការ សមាគម ផលិតករ សិប្បករ និងអ្នករចនាម៉ូត សរុបប្រមាណជាង ១០០នាក់។
នាឱកាសនោះ លោកជំទាវរដ្ឋលេខាធិការ បានកោតសរសើរ និងវាយតម្លៃខ្ពស់ចំពោះកិច្ចខិតខំរបស់ក្រុមហ៊ុន BEYOND RETAIL BUSINESS ក្រោមការគាំទ្ររបស់សភាពាណិជ្ជកម្ម និងឧស្សាហកម្ម បារាំងប្រចាំនៅកម្ពុជា ដែលបានផ្តួចផ្តើមរៀបចំឲ្យមានកម្មវិធីផ្គូរផ្គងពាណិជ្ជកម្ម សម្រាប់ផលិតផលដែលមានដើមកំណើត ផលិតនៅក្នុងខេត្តសៀមរាប គុណភាពខ្ពស់ ដើម្បីលើកតម្កើនផលិតផលក្នុងស្រុក និងជំរុញការធ្វើពិពិធកម្មលើផលិតផល និងទីផ្សារ។
កម្មវិធីផ្គូរផ្គងពាណិជ្ជកម្មសម្រាប់ផលិតផលសៀមរាប នេះ ជាផ្នែកមួយនៃយុទ្ធសាស្ត្រចតុកោណដំណាក់កាលថ្មី របស់រាជរដ្ឋាភិបាលកម្ពុជា ដែលវិស័យសាធារណៈ និងឯកជនរួមគ្នារៀបចំយុទ្ធសាស្ត្រអភិវឌ្ឍន៍វិស័យពាណិជ្ជកម្ម ដោយចាប់ផ្តើមពីការអភិវឌ្ឍន៍ផលិតផល និងមនុស្ស។ សកម្មភាពនេះ បានជួយនាំផ្លូវផលិតករកម្ពុជាបានស្គាល់ពីទំនោរទីផ្សារបច្ចុប្បន្ន យល់ពីគុណតម្លៃនៃការច្នៃម៉ូដ ការអភិវឌ្ឍន៍ផលិតផល ដើម្បីទទួលបានតម្លៃបន្ថែមលើកផលិតផល និងសេវា។
ម្យ៉ាងទៀតសកម្មភាពនេះបានដើរស្របគ្នាជាមួយយុទ្ធសាស្ត្រអភិវឌ្ឍវិស័យពាណិជកម្ម ដោយក្រសួងពាណិជ្ជកម្ម បានរៀបចំយុទ្ធនាការទិញផលិតផលខ្មែរក្នុងក្របខណ្ឌទូទាំងប្រទេសបានចំនួន ៦រដូវកាលកន្លងមកហើយ និងបានប្រមូលកៀរគរផលិតផលឆ្នើម គុណភាពខ្ពស់ពីគ្រប់បណ្តាញ មកដាក់តាំងបង្ហាញបង្កើតជាឱកាសទីផ្សារ និងជំរុញឲ្យមានការចូលរួមគាំទ្រ និងប្រើប្រាស់ផលិតផលក្នុងស្រុកឲ្យបានច្រើនជាអតិបរមា។
ជាមួយគ្នានេះ លោកជំទាវ រដ្ឋលេខាធិការ បានជម្រាបអង្គពិធីទាំងមូលថា វិស័យពាណិជ្ជកម្មបានរួមចំណែកយ៉ាងសំខាន់ក្នុងការអភិវឌ្ឍ និងជំរុញដល់កំណើនសេដ្ឋកិច្ចជាតិ។ កម្ពុជានៅតែមានឱកាសអាចនាំចេញទំនិញទៅកាន់ទីផ្សារអន្តរជាតិ ដូច្នេះ សហគ្រិនកម្ពុជាត្រូវខិតខំបង្កើតគំនិតច្នៃប្រឌិតអភិវឌ្ឍន៍ផលិតផលសម្រាប់បំពេញតំរូវការទីផ្សារ។ ក្នុងឱកាសនេះដែរ លោកជំទាវ បានអំពាវនាវសុំម្ចាស់ជំនួយ និងដៃគូអភិវឌ្ឍន៍ទាំងឡាយសូមរៀបចំផែនការជួយពង្រឹងផលិតកម្ម និងការអភិវឌ្ឍន៍ផលិតផលដោយធ្វើការដោយផ្ទាល់ជាមួយផលិតករ សិប្បករកម្ពុជានៅមូលដ្ឋាន។
ផលិតផលផលិតនៅសៀមរាប ដែលសម្រិតសម្រាំងជ្រើសរើសយកមកដាក់តាំងនៅទីនេះគឺជាស្នាដៃរបស់ផលិតករ និងអ្នកច្នៃម៉ូដខ្មែរ និងបរទេស ដែលខិតខំធ្វើការរួមគ្នាបង្កើតគំនិតផលិតទំនិញថ្មី គុណភាពខ្ពស់និងមានការគាំទ្រលើទីផ្សារទាំងក្នុងនិងក្រៅប្រទេស។
(អត្ថបទ និងរូបភាព៖នាយកដ្ឋានកិច្ចការពិព័រណ៍)
